Á næstunni verða gefnar út nýjar leiðbeiningar bæði í endurlífgun og skyndihjálp. Leiðbeiningarnar byggja á alþjóðlegum vísindarannsóknum og sérfræðiráðgjöf og eru viðurkenndar um allan heim. Evrópska endurlífgunarráðið mun gefa út nýjar leiðbeiningar um grunnendurlífgun, sérhæfða endurlífgun og notkun hjartastuðtækja þann 18. október. Landsfélög Rauða krossins gefa síðan út leiðbeiningar um ýmis atriði skyndihjálpar, ætlaðar almenningi. Í kjölfarið þarf að endurskoða kennsluefni í endurlífgun og skyndihjálp, útbúa nýja vinnuferla fyrir heilbrigðisstarfsmenn og bjóða upp á endurmenntun fyrir fagfólk og almenning.
Endurlífgunarráð Íslands og Skyndihjálparráð Íslands telja mikilvægt að staðið sé faglega að útgáfu nýrra leiðbeininga í endurlífgun og skyndihjálp hér á landi og innleiðing þeirra samhæfð eins og kostur er. Í því augnamiði verða megin atriði nýju leiðbeininganna um grunnendurlífgun og sérhæfða endurlífgun þýddar og gefnar út af Endurlífgunarráði Íslands og Skyndihjálparráði Íslands í samvinnu við Landlæknisembættið. Verða þær svo aðgengilegar á heimasíðu Endurlífgunarráðs Íslands (www.endurlifgun.is) og Landlæknis (www.landlaeknir.is) í upphafi árs 2011. Nýju leiðbeiningarnar í skyndihjálp verða hinsvegar gefnar út af Rauða krossi Íslands í kennslubókinni Skyndihjálp og endurlífgun, þú getur hjálpað þegar á reynir í henni verður einnig fjallað um grunnendurlífgun. Bókin er væntanleg á vormánuðum 2011 sjá nánar síða á heimasíðunniwww.raudikrossinn.is Mælst er til þess að farið verði að vinna og kenna eftir nýjum leiðbeiningum eigi síðar en þann 1. mars á næsta ári.
Bestu kveðjur
Felix Valsson formaður Endurlífgunarráðs Íslands
Gunnhildur Sveinsdóttirritari Skyndihjálparráðs Íslands
Bréf þetta er sent á öll sjúkrahús, heilsugæslustöðvar og hjúkrunar og dvalarheimili, auk ýmissa heilbrigðisstofnanna og fyrirtækja í heilbrigðisþjónustu.
